Estimad@s compañeir@s e amig@s:

É unha honra presentar o XV Congreso Galego de Radioloxía, que celebraremos en Ourense os días 9 e 10 de maio de 2025. Nesta edición, deseñamos un programa transversal, pensado para todas e todos os profesionais da radioloxía, combinando relatorios de alto nivel con espazos de debate e intercambio de experiencias.

Un dos puntos clave deste congreso será os avances en intelixencia artificial aplicados á nosa especialidade. A IA está a transformar o diagnóstico por imaxe e redefinindo o noso papel na práctica clínica, polo que preparamos sesións específicas para analizar o seu impacto presente e futuro.

Ademais, queremos destacar o papel fundamental das e dos Técnicos Superiores en Imaxe para o Diagnóstico (TSID), peza clave nos nosos servizos. Por iso, este congreso contará cun espazo específico para elas e eles, onde se abordarán temas do seu interese e o seu papel na evolución da radioloxía.

Tamén animamos á participación a través da presentación de comunicacións científicas, unha parte esencial do congreso que nos permitirá reflectir o traballo e os avances dos nosos servizos, así como compartir experiencias e coñecementos que enriquecen a nosa práctica diaria.

Este congreso será unha gran oportunidade para compartir ideas, debater sobre o futuro da nosa profesión e aprender unhas das outras e uns dos outros. Queremos que vos sintades cómodas e cómodos, que gocedes do evento e que Ourense se converta no lugar perfecto para atoparnos e seguir avanzando xuntas e xuntos.

Esperamos contar coa vosa participación nun congreso que agardamos sexa unha excelente ocasión para a aprendizaxe e o intercambio de experiencias.

Saúdos,

Diego Domínguez Conde e Jessica Casas Martínez

Vicepresidentes do comité local do XV Congreso Galego de Radioloxía.